ഒരുകാലത്ത് ബോളിവുഡില് നിറഞ്ഞു നില്ക്കുകയും രണ്ടുവര്ഷം മുമ്പ് വിവാഹ ജീവിതത്തിലേയ്ക്ക് പ്രവേശിക്കുകയും ചെയ്ത നേപ്പാളി സുന്ദരി കാന്സര് ബാധയുടെ പേരിലാണ് അടുത്തിടെ വാര്ത്തകളില് നിറഞ്ഞത്. മുംബൈയില് വച്ച് ഏതാനും ആഴ്കള്ക്ക് മുമ്പ് മാത്രം കാന്സര് സ്ഥിരീകരിച്ച മനീഷ അമേരിക്കയിലെ ശസ്ത്രക്രിയയ്ക്ക് ശേഷം ഇപ്പോള് വിശ്രമത്തിലാണ്. തന്റെ മനക്കരുത്ത് കൊണ്ട് രോഗത്തെ കീഴ്പ്പെടുത്തിയ ഈ ബോളിവുഡ് നായിക ഇപ്പോള് വളരെ ആത്മവിശ്വാസത്തിലാണ്.
"ഞാന് ഒന്നിനെ കുറിച്ച് ആലോചിച്ചും വേദനിക്കാറില്ല. എനിയ്ക്ക് എന്തെങ്കിലും സംഭവിച്ചതായി തോന്നുന്നില്ല. എന്റെ അസുഖം എനിയ്ക്ക് ഒരു പാഠമായിരുന്നു. പലതും അവഗണിച്ചും കാണാതെയും മുന്നോട്ട് പോകുന്ന ഈ ജീവിതത്തില് ചില ഓര്മ്മപ്പെടുത്തലുകള് അത്യാവശ്യമാണ്"- താരം ട്വിറ്ററില് കുറിക്കുന്നു.
" ഇപ്പോള് ഞാന് എല്ലാത്തിനേയും ഭൂതക്കണ്ണാടി വെച്ചാണ് നോക്കുന്നത്. എല്ലാ സാഹചര്യത്തേയും നേരിടാന് എനിയ്ക്ക് ധൈര്യം തന്ന ഒരു ശക്തിയുണ്ട്. ആദ്യമായി നന്ദി പറയാനുള്ളത് ആ ശക്തിയോടാണ്. ഓരോ മനുഷ്യര്ക്കും വേദനയുണ്ട്. എന്നാല് അത് പല രീതിയിലായിരിക്കുമെന്നുമാത്രം. ആ വേദനയെയെല്ലാം തരണം ചെയ്ത് മുന്നോട്ട് പോകുന്നവര്ക്കേ ജീവിതത്തില് മുന്നേറാന് സാധിക്കുകയുള്ളൂ. എന്തിനേയും നേരിടാന് തയ്യാറായ ഒരു മനസ് ഉണ്ടാവുകയെന്നതാണ് വലിയ കാര്യം"- മനീഷ ഓര്മിപ്പിക്കുന്നു.
"എനിയ്ക്ക് വേണ്ടി പ്രാര്ത്ഥിച്ച ഒരു പാട് പേര് ഉണ്ട്. അവര്ക്കെല്ലാം ഞാന് എന്റെ നന്ദി പറയുകയാണ്. എന്നെ സ്നേഹിക്കുന്നവര് ഉണ്ടന്ന് അറിയുന്നത് തന്നെ വലിയ കാര്യമാണ്"- മനീഷയുടെ മനസ് നിറഞ്ഞ വാക്കുകള്.
മലയാളത്തിലുള്പ്പെടെ അഭിനയിച്ച മനീഷ അസുഖം ഭേദമായി വൈകാതെ അഭിനയ രംഗത്ത് തിരിച്ചെത്താമെന്ന പ്രതീക്ഷയിലാണ്. മനീഷയ്ക്ക് അണ്ഡാശയ കാന്സര് ആയിരുന്നു. കഴിഞ്ഞ മാസം ആണ് മനീഷ ന്യൂയോര്ക്കില് ശസ്ത്രക്രിയയ്ക്ക് വിധേയയായത്.